Entamó l`añu cola primer gran cita quesera de la temporada. XXX Festival del Quesu d`Afuega`l Pitu na Foz de Morcín…Si si…Comu l`oyen. Trenta ediciones van cellebrándose de la fiesta d`esti tradicional y popular quesu asturianu entamada pola Hermandá La Probe de La Foz de Morcín. Aniversariu que cuntó pa la ocasión con el, anguañu consideráu por dalgunos, “embaxador” de la gastronomía asturiana nel gran imperiu americanu.
José Andres aportó y recibió el prestosu galardón de “Queseru Mayor d`Asturies” (digo lo de “prestosu” porque servidor que ya lu recibió en su día, tien a bien el saber perfechamente que ye lo que se siente cuando a ún y reconocen públicamente el so trabayu en favor de los quesos asturianos). Amás d`eso el cocineru, mierense de ñacencia, ufiertó a los cientos de persones ellí presentes un “improvisáu” pregón, nel que, amás d`amosanos la so facilidá de pallabra (que pa eso ye enforma televisivu), foi quien a transmitir un sentimientu de ciñu polo nuestru, d`empatía, de compromisu y porque nun dicilo…de complicidá.
No referíu a la calidá de los quesos participantes nel certamen, el 2010 nun foi un de los meyores años. El reciente temporal y les baxes temperatures foren dalgunos de los argumentos cimeros de los propios productores pa xustificar la presentación a concursu de quesos demasiáu frescos y con poca intensidá no referíu a aromes y sabor.
La Quesería La Figar, de Morcín, foi la gran trunfaora algamando cuatro premios estremaos, y ye de recibu facer mención especial a l`apaición nel mercáu de los quesos d`Afuega`l Pitu de la Quesería “Rey Silo”, ellaboraos con lleche crudo de vaca, con más de dos meses de mauración y qu`algamaron un primer premiu na categoría de “quesos atroncaos roxos”.
Seiscientos cincuenta euros pagó la Sidrería Casa Fausto de Cualloto pol llote de los quesos ganaores. A Cualloto foi tamién a parar el llote de los segundos premios de la mano de la Sidrería Tierra Astur, y un pocu más p`alla, en Fonciello, nes nueves instalaciones de COASA, la comercializaora qu`esporta los nuesos quesos allí onde Jose Andrés fae fortuna, quedó el llote de los terceros premios.
Disgraciadamente pa Jose Andres, la so apretada axenda nun-y permitió esfrutar de lo meyor de la fiesta, que nun ye otro que la camaradería cola que la que Pepe Sariego, Director del Museu de la Llechería ya impulsor y organizaor d`esti Certame dende`l so aniciu, acueye a la totalidá de productores, espositores, collaboraores, autoridaes y amigos…Al noble cocineru astur-yanki saltarían-i de xuru les llárimes d`emoción si pudiera habese quedáu a esfrutar con nos d`aquel impresionante pote de nabos con compangu.
Y ye que coincidiendo col festival de l`Afuega`l Pitu la comarca de les cumes del Aramu, el Monsacro y l`Angliru tamién cellebra les Xornaes Gastronomiques del Pote de Nabos. El Nabu, un productu ya casique escaecíu que foi por sieglos ingrediente básicu na nuesa allimentación xuntu cola castaña comu ellementos sustitutivos de la pataca, anantia que mos aportara el “popular” tuberculu de les Amériques.
Anguañu, el nabu ya casique nin se cultiva comu forraxe pal ganáu…Pero dende Morcín, la Cofradía de los Nabos, la Hermandá La Probe y los hosteleros de la fastera, precuren evitar que se mos escaeza que ellí prodúxose, produzse, consumiose y consumese entá un tubérculu que, comu tantos otros productos asturianos, aporta sentíu, hestoria, identidá y diferenciación a la nuesa cultura gastronómica y nagüa por ser calteníu, recuperáu, prestixáu y promocionáu.
0 comentarios:
Publicar un comentario en la entrada